انا مخطوبة من اربع سنين هو قريبى وانا بحبه جدا انا بطبعى بحب اللمة
والهزار والضحك يعنى زى ما بيقولو مفرفشة بس فى نفس الوقت رومانسية خطيبى
بقى خجول جدا حتى معايا كل حاجة انا اللى بدات بيها انا اللى حبيته الاول
وانا اللى بعتله اول رسالة اعرفه فيها انى بحبه وانا كمان اللى قولتله بحبك
الاول بمعنى اصح مدلوقة عليه وهو راسى جدا وهادى اوقات كتير بحس انه
بيحبنى واوقات بحس انى ولا فارقة معاه انا اتعودت منه على حاجات كتير هو
بيعملها وبحاول اتاقلم عليها بس فى حاجات كتير جدا مش عارفة اعديها فى
حاجات بسيطة اوى بتفرحنى وهو مبيعملهاش وانا قولتله كده بس هو مبيهتمش هو
مسافر دلوقتى وهنتجوز ان شاء الله بعد سنة ونص انا تعبت من اهماله ليا
مبيغرش الا لما اتكلم معاه عن حد انا اعرفه اوقات كتير بحس انه مبيخافش
عليا احنا الحمد لله التلت سنين اللى قضاهم معايا عمره ماحاول يمسك ايدى
ولا يعمل حاجة مش مظبوطة انا مش زعلانة من ده بس اكيد لازم يكون عنده مشاعر
ناحيتى لو بيحبنى زى ما بيقول انا زعلت منه كتير جدا بسبب الموضوع ده وكنت
كل مرة اقوله ولا فى فايدة لما نتكلم انا اللى اتكلم واقوله انا عملت ايه
طول النهار وايه اللى حصل معايا فى اليوم ده على اساس انه يقولى هو كمان
ايه اللى حصل فى يومه لكن لا مبيحصلش هو غامض جدا جدا احيانا بحس انى فهماه
غلط او مش فهماه خالص انا بحبه جدا جدا جدا وبعمل كل حاجة تريحه بس هو مش
عايز يريحنى عايزنى اكبر دماغى من كل حاجة وابقى بارده وانا مينفعش ابقى
كده معاه انا مبحاولش ازعله ولما بزعل منه انا اللى بصالحه احنا دلوقتى
متخاصمين لسبب تافه جدا الحقيقة انا اللى زعلت لانه كنا بنتكلم مع بعض
وسابنى وقعد يتفرج على التليفزيون فسبت السماعة لاخويا يسمع اللى كان
بيسمعه وقومت ولنا اخويه كلمه رد عليه وقالى قومى كلميه وانا قولتله لا
وقوله انى مش عايزة اكلمه انا مش عارفة هو عارف انى زعلت ولا لا بس هو قال
لاخويا ماشى خلاص سلام وقفل ومسالش عليا ولا اى حاجة هو سبب تافه بس والله
يا جماعة محدش حاسس بيا دلوقتى لانه انا تعبت نفسى يحبنى ويبين مشاعره
ناحيتى ويقولى بحبك ووحشتينى والكلام ده اللى انا مبسمعهوش انا عارفة انى
غلط من الاول علشان رخصت نفسى ومتقلتش عليه بس انا كده مبعرفش اخبى ياريت
حد يقولى اعمل معاه ايه علشان اخليه يبقى ملهوف عليا ويبقى عايز يكلمنى
ويحسسنى انه بيحبنى وخايف عليا ويا ترى لما نتجوز هيبقى كده برضو ولا
هيتغير ؟؟ انا اسفه انى طولت عليكم بس ارجوكم ساعدونى وقولولى حل لانى تعبت
